السمك السنجارى

احلى طريقة لعمايل السمك السنجارى
اهم حاجة انك تجيب سمكة كبيرة ويا ريت تكون سمك بورى الوحدة تقريبا كيلو وده موجود محدش يتحجج اول حاجة الحشو وهو ده اهم حاجة الحشو عبارة عن
1- بصل مبشور
2-طماطم مبشورة مش مقطعة
3- فلفل اخضر مبشور
4-حوالى 10 فصوص ثوم
نجيب كل المكونات دى مع بعض ثم اضيف عليهم زيت وملح وشطة وكمون وفلفل اسمر
ثانى حاجة نجيب السمكة ونفتحها وننظف القلب كويس ونشطفها كويس وبعد كدة نحاول نخلى السمكة من العضم كله وده طبعا طريقة سهلة جدا
نجيب الخلطةونحطها فى السمكة و نجيب ورق حرارى ونحط السمكة فيه وممكن من غير الورق الحرارى فى صينية نجيب نصف كباية عصير لمون ونحطها على السمكة وبعدين نحطها فى الفرن على درجة حرارة180 وبالهنا وشفا

يا ريت تحددى اكتر دغابيس مخلية ولا بالكارى ولا دغابيس الطرح ولا ايه

هو انت غيرت وظيفتك امتى محدش قالى يعنى ولا كدا اصحابك اخر من يعلم على العموم يا ريت نشوفها عملى الاول عندك ان طلعت حلوة كل واحد يجربها فى البيت عنده مش ممكن اعملها ومتعجبنيش يقى خسرت السمك على قلت فايده وانت كمان محدد النوع والوزن با سلام خبير يا عالم

ياعم وليد قولنا حاجه نعرف نجيبها و تكون على اد الحال ، انا يوم مفكر اشترى السمك اللى انت تقول عليه ده محتاج مرتب +مرتب +مرتب+مرتب +مرتب +مرتب + مرتب على مرتبى
فما بالك لو عزمتك عندى على اكله ذى دى تكلفنى كام
ياعم كلمنى عن السمك اللى بعشرة خمستاشر جنيه .